Praesentium literarum exhibitor, Dom[inus] CLAUDIUS ALSTRÖMER, Nobilis Suecus, qui ad hanc Academiam Upsaliensem numero Civium academicorum Anno 1750 adscriptus fuit, ab eo tempore operam indefessam navavit rebus Oeconomiam privatam et Historiam Naturalem spectantibus, meoque lateri per plures annos arcte adhaesit, et in plerisque Historiae Naturalis partibus istos fecit progressus, quos discipulorum meorum nullus alius. Hunc itaque praestantissimum dilectissimumque artis meae filium, tamquam proprium commendo Omnibus, qui Virtutem, Sapientiam, Botanicen reliquasque Scientiae Naturae partes amant et colunt; praestita ipsi officia tamquam in me ipsum collata semper reputabo.