Tuas, Vir Amplissime, d[ie] 20 januarii datas rite habui, nec suaviores umquam. Laetor magnopere, quod etiamnum valeas et vigeas. Tantis me involvisti antiquae et infucatae amicitiae documentis, ut videbam me haerere in Tuis amplexibus. Vix dies prae-teriit, quin Te cogito, cui, dum vixero, debeo plura quam alio ullo. Tuas dum quotidie evolvo, obstupesco ad merita Tua. Ante Tuum tempus paucissimae exoticae plantae fuere rite figuris illustratae; jam vero Tua ope plurimae. Vellem, quod numerares quot plantarum e[di]disti figuras in Thesauro Zeylanico, Dec[adibus] Africanis, Rumphii Herbario, Plumieri Americanis; quaeso, numeres et communices quot Species figuris illustratae sint in his omnibus simul. Certe nullus mortalium paria praestabit Scientiae. Cum edidisti Catalogum Tuum Indicarum plantarum, quaeso, pro amicitia Tua eum communices.
Nondum accessit fasciculus datus D[omino] Balguiero. Utinam mitteret, antequam semina exsiccarentur.
Non obliviscar commendare filium Tuum suavissimum membrum societatis nostrae.
Cum in epistola Tua perveni ad Filii Tui Clarissimi morbum, exhorrebam; vix ausus legere sequentia. Tibi et Publico gratulor, mihique maxime de ejus felici restitutione; faxit Deus, ut plenarie reconvalescat, ne morbus relinquat aliquam labem.
Laetor animitus, quod nunc non tantum liceat gratulari Tibi et illi de felici restitutione sed et de sparta in orbe illustrissima, dum nomine, omine et haereditate Tibi in munere succedat; hoc unicum et ultimum nostrum votum; memini qua laetitia ipse perfusus fui, dum mea sparta concedebatur a S[erenissimo] Rege filio meo. Nunc ex illis, quos voco meos, Professores habeo Burmannum Amstelodami, Beckmannum Gottingae, <u<Falk Petropoli, Kuhn Philadelphiae, Solandrum Londini, Fabricium Hafniae.
Tua ope et per plantas mecum a Te benevole communicatas plurimae Indicae et Capenses ad sua genera relatae sunt, quae antea vagae et incertae erant. Dum tu vixeris, qui possides inter mortales summam collectionem siccatarum plantarum ex hisce dissitis regionibus, et ego, qui magis in generibus laboravi, quam forte alius, quaeram devotissime, numne velles mecum communicare literis flosculum ex etiamnum dubii generis plantis, et spondeo sanctissime, quod Tibi integrum erit nomen cuique generi novo imponendi. Sic potuissemus conjunctis viribus etiamnum aliquid praestare. Quoties Africanas Tuas pervolvo, haesito
ad Rapuntium t. 39. f. 1. Lychnidea t. 49. f. 4. Crataegus t. 87. f. 1. Leucoxylon t. 92. f. 1. 2.
In Zeylanicis Chamaelea t. 24. An Leea? Ricinocarpos t. 93. f. 1. An Acalypha?
In Amboinensibus. Casuarinam utramque habeo exsiccatam, sed absque floribus; si habeas, quaeso, mittas florem; videtur novi generis et Cupressi affinis, sed distinctum genus.
Faba marina est Mimosa.
<u<Globba siccam habeo jam cum flore; novi generis est, ad diandriam monogyniam spectat.
Lingoum Pterocarpus. Si habeas florem, unicum mihi exoro, cum nondum certus, utrum filamenta sint distincta aut coalita.
Pandani genus. Anne umquam vidistin flores, et sexcenta alia?
Inclusam schedulam, quaeso, tradas filio Tuo.
Millies cogitavi de Ixiae affinibus Tuis, quarum stupendam copiam possides et optavi eas videre apud Te, si non vivas, tamen siccas.
Quaeso, mittas mihi aliquot semina pro futura aestate, si vixero, ut habeam aliquid grati, quo fallam senium meum.
Quaesivi ab omnibus Botanicis Loosam (Ortigam Fewillaei), quae fuit in Hortis Europaeis ante duos annos, unde possideo specimen optimum, sed nullus potuit mihi semina procurare; si occurrat in vestra patria, quaeso, millies des mihi unum alterumve, cum nulla planta mihi in hac vita gratior esse[t] visu, viva.